ابن عز: فتش في الأوراق ..

الجمعة، 18 أبريل 2008

فتش في الأوراق ..

" من عيوبنا الاجتماعية , خط قلمي منولوج بلدي .."

آهات وبسمات / منولوج بلدي (1)

فتش .. فتش في الأوراق
راحت فين بس الأخلاق !
......

آدى راجل عنده عمارة
كل شيء في حياته تجارة
جاله شباب لسة طالعين
بس أملهم نص الدين
عايز شقة ولو أودتين
بص وقال عايز ملايين

فتش في الأوراق ...

وآدى تاجر كله شطارة
أسعاره دايماً طالعة لفوق
طالع واكل .. نازل واكل
ولا في ذمة ولا في ذوق

فتش في الأوراق ...

وآدى طبيب مشهور متصيت
جاله عجوز مسكين بيعيط
الحق ابني يا سيد الناس
تحت عجل أتوبيس انداس
بص وقاله هات وهات
بعد شوية , الواد أهو مات

فتش في الأوراق ...

وآدى الواد أهو خلص جامعة
عايز يبني .. يولع شمعة
دار ولف في كل مكان
نفسه في شغل , يعيش بأمان
بس خسارة رجع ندمان
من غير وسطة ازاي هيبان

فتش في الأوراق ...